الايلاينر السائل من اكتر انواع الايلاينر صعوبة في رسمة وخصوصا للمبتدئين, واي حركة غلط وانتي بترسمي هتبوظلك الرسمة كلها, لكن اكيد مع شوية صبر وممارسة هتقدري ترسمية صح ويطلع معاكي مظبوط, والنهاردة من خلال موضوعنا هنقولك طريقة رسم الايلاينر السائل للمبتدئين خطوة بخطوة بالصور.
– تجهيز العين قبل رسم الايلاينر:
قبل ما ترسمي الايلاينر جهزي الاول جفون العين عشان تثبتيه لاطول فترة وميسحش منك, حطي طبقة من البرايمر السائل او الكريمي, هيثبت الايلاينر والايشادو وهيديكي لوك ناعم للعين.
ونصيحة انك تجعدي رموشك باداة تني الرموش Lash curler قبل رسم الايلاينر.
– طريقة رسم الايلاينر السائل للمبتدئين:
دلوقتي هنشوف مع بعض الخطوات بالصور خطوة بخطوة لطريقة رسم الايلاينر.
الحاجات اللي هتحتاجيها:
ايلاينر سائل.
اداة تني الرموش.
ماسكارا.
وبنات حوا بترشحلك ايلاينر سائل من سماش بوكس Smashbox Limitless Waterproof, الايلاينر ده بيتميز بطرف مستدير هيسهل عليكي رسم خط الايلاينر على طول خط الرموش, وتركيبته ثابتة هتدوم معاكي طول اليوم من غير ما يسيح.
– خطوات رسم الايلاينر على الجفن اللي فوق:
1- الخطوة الاولى: امسكي الفرشة بشكل مستقيم:
اول حاجة هزي انبوبة الايلاينر, عشان يبقى ناعم وسلس معاكي في الرسم, وعشان الرسمة تطلع معاكي مظبوطة حافظي على مسك الفرشة بشكل مستقيم او مسطح زي ما هو باين قدامنا في الصورة كده.
2- الخطوة التانية: ابدأي من النص:
قربي من خط الرموش على قد ما تقدري, وابدأي الرسمة من نص الجفن واسحبي للزاويا الخارجية للعين, وبعدين استخدمي الايلاينر الباقي في الفرشة كملي بيه الخط للزاوية الداخلية للعين.
3- الخطوة التالتة: ارسمي الجناح:
امشي مع خط الرموش السفلي, وارسمي الجناج لفوق, الخطوة دي هتساعدك ان خطين الايلانير متساويين.
4- الخطوة الرابعة: اظهار الرموش:
عشان تظهري العيون اكتر ياما تركبي رموش او تحطي اكتر من طبقة ماسكارا عشان تكملي اللوك.
وده هيبقى اللوك النهائي للرسمة.
– خطوات رسم الايلاينر على خط الرموش اللي تحت:
الخطوة دي هتبقى مفيدة جدا لو عيونك صغيرة لانها هتدي حجم اكبر للعين, المهم انك ترسميه صح على خط الرموش وتتأكدي انه ميجيش على خط الماء لانه هيديكي نظرة حادة ويضيق العين بدل ما يوسعها.
الحاجات اللي هتحتاجيها:
ايلاينر سائل.
فرشة رفيعة.
1- الخطوة الاولى: ابدأي من الزاوية الخارجية للعين:
استخدمي فرشة رفيعة عشان ترسمي خط ايلاينر على خط الرموش اللي تحت, وابدأي من الزاوية الخارجية للعين واسحبي الرسمة عشان توصليها بالجناح اللي فوق.
2- الخطوة التانية: اسحبي الخط لنص خط الرموش:
استمري في الرسمة واسحبيها لنص خط الرموش, ناحية الزاوية الداخلية للعين, وخلي الفرشة قريبة من جذور الرموش على قد ما تقدري.
3- الخطوة التالتة: الزاوية الداخلية للعين:
الخطوة دي مهمة عشان تدي وسع اكتر للعين خلي الخط بعيد عن القناة الدمعية للعين بحوالي 2 ملل, ومدي الخط للزاوية الداخلية من بره الجفن.
4- الخطوة الرابعة: املي اللون:
بعد ما ظبطي الخط ابدأي املي الفراغات باستخدام الفرشة الرفيعة اللي استخدميها لرسم الايلاينر على خط الرموش اللي تحت, مع تحريك الفرشة لقدام وورا عشان تملي كل الفراغات كويس.
وده هيبقى اللوك النهائي للعين.
– نصايح لرسم الايلاينر السائل وغلطات لازم تتجنبيها:
دلوقتي بعد ما شوفنا خطوات رسم الايلاينر, تعالوا نشوف شوية نصايح وحيل هتسهل عليكي الرسم خصوصا لو مبتدئة.
1- لما تيجي تشتري الايلاينر اختاري النوع اللي بيكون Waterproof, smudge-proof, عشان ميسحش منك في نص النهار وخصوصا لو كنتي هتستخدميه على خط الرموش اللي تحت.
2- لو ايدك دايما بتتهز وانتي بترسمي جربي تقعدي وتسندي كوعك على سطح ثابت مستوي, واسندي صوباعك الخنصر على خدك وانتي بترسمي الطريقة دي هتخلي ايدك ثابتة والخط يطلع معاكي مظبوط.
3- لو مبتدئة في رسم الايلاينر السائل, جربي ترسمي نقط او شرط وتوصليهم ببعض بدل ما ترسمي خط كامل مرة واحدة.
4- جعدي الرموش بأداة تني الرموش قبل الرسم.
5- عشان تتأكدي ان الجناجين للعيون الاتنين يطلع مظبوط ومتساوي, ممكن ترسمي نقطة في الزاوية الخارجية لكل عين قبل الرسم عشان يطلعوا متساويين.
6- لو عيونك صغيرة, متوصليش الخطين اللي فوق واللي تحت في الزاوية الداخلية للعين ببعض لان ده هيقفل العين وهيبينها اصغر.
7- دايما ابدأي برسم خط رفيع ولما تظبطيه تقدري تزودي السمك بتاعه زي ما انتي عايزة.
8- ممكن باستخدام برايمر او كونسيلر بعود قطن تظبطي اي لغبطة حصلت وانتي بترسمي.
9- متشديش عينك او تسحبيها اوي وانتي بترسمي لانك لما هتسيبي العين هتلاقي الرسمة مش مظبوطة معاكي, حاولي بس تستخدمي صوابعك لتثبيت الجلد بس من غير ما تشديه.
10- ممكن كمان تستخدمي الشريط اللاصق على العين عشان يسهل عليكي ترسمي عيون القطة اسهل.
11- وجود فراغ ما بين خط الايلاينر وخط الرموش هيخلي شكل العين مش حلو, وعشان تتجنبي ده ممكن تستخدمي ايلاينر قلم عشان تقدري تتحكمي فيه اكتر وحاولي ترسمي الخط قريب من خط الرموش على قد ما تقدري.
12- مهم جدا انك تثبتي الايلاينر بعد ما تحطيه عشان ميلطخش الجفون, وعشان تعملي ده بعد ما ترسميه سيبيه يتشف خالص, وبعدين بالفرشة حطي طبقة من البودرة الشفافة فوقيه ده هيحافظ عليه من التلطيخ وهيخليه يدوم فترة اطول.