🌸مكونات عجينه البيتزا الايطالي
دقيق - زيت زيتون- بيض-لبن-مسطرده-خميره فوريه-سكر -ملح
🌸المقادير
كيلو دقيق كافي لعمل 4 فورم بيتزا ويستحسن يبقي نص دقيق عادي ونص دقيق خمس نجوم او نوع يكون كويس وتخلطيهم علي بعض..
نص كوب لبن-بيضه واحده - 3 معالق ك زيت زيتون- معلقه مسطرده-معلقه صغيره خميره فوريه ومتكتريش من الخميره-معلقتين سكر بودره ك-معلقه ملح..
🌸طريقه_العجينه
هتحطي المقادير كلها مع بعض في وعاء ما عدا الخميره يعني اللبن والبيض والسكر والملح والزيت والمسطرده والمايه مع بعض وتقلبيهم كويس وبعد كده تحطي الخميره فوق الدقيق بلاش تقلبيها فمايه لوحدها مش عيش هو😂وبعد كده تعجني بقا بحيث تكون العجينه متماسكه كويس ومتلزقش ويكون فيها عرق....
هتحطي العجينه فكيس وتسبيها تاخد وقتها وتخمر براحتها
🌸طريقه_الفرد
هتقسمي العجينه بحيث تكون القطعه من 200 الي 250 جرام وتدوريها كويس وبعد كده هتفرديها بدقيق بحيث تكون كلها متساويه مفيش حته عاليه وحته واطيه بلاش مطبات 😂
ولو حسيتي انها صعبه فالفرد سيبيها بعد متكوريها فالدقيق شويه هتريح وهتبقي سهله...
🌸الصوص
صلصه هتسبكيها ببصل وتوم وجزر مبشور وفلفل حامي بسيط
وتتبليها بملح وفلفل اسود وزعتر خشن اهم حاجه الزعتر والله
🌸الجبنه
اولا سيبوكم من العبوات ال400 جرام لانها غاليه ومش كويسه
الملكه _الاطباء افضل نوعين ولو ملقيتهمش يبقي هاتي جبنه موتزريلا سايبه هتبقي كويسه ومتطمعيش انها هتبقي زي بيتزا هت لانهم عندهم مصنع بيصنع ليهم الجبنه ومبيبعهاش وبيصنعها بالدسم اللي هما عايزينه وبرضه مبيبعوهاش😂😂
🌸الفورمه
ادهني الفورمه زيت بسيط وبعدين حطي العجينه بعد مفردتيها فالفورمه وغطيها بكيس بلاستيك وسيبيها تخمر براحتها بحيث ترتفع معاكي
بعد كده ممكن تحطيها فالتلاجه شويه
الفلفل والطماطم والزيتون الشرائح اساسي ع اي بيتزا
هتفردي الصوص علي البيتزا ومتحاوليش تجبيه ع الحروف
وتخرمي العجينه بشوكه بس مش كتير
حطي رشه جبنه رومي بسيطه عالصوص وبعد كده الحشو وافردي الحشو كويس وياريت الحشو يتقطع قطع صغيره و تحطي الفلفل والطماطم والزيتون وبعد كده تحطي الموتزريلا
كيلو الجبنه الموتزريلا بيعمل ست بيتزات
هتوزعي الموتزريلا كويس
🌸التسويه
درجه حراره الوش 300
والارضيه 100 او اقل علي حسب ماتخمر معاكي
واديها رشه زعتر عالوش بعد ما تطلع
ودوقي احلي بيتزا😉